سرکاری بیانات و احکامات
منفی پروپیگنڈا ہمیں افغانستان میں اسلامی شریعت کے نفاذ سے نہیں روک سکتا: وزیرِ امر بالمعروف
وزارتِ امر بالمعروف، نہی عن المنکر و سماعتِ شکایات کے زیرِ اہتمام اسلامی قانونِ امر بالمعروف و نہی عن المنکر کے مؤثر نفاذ کے لیے مرکزی زون کے سات صوبوں کے علمائے کرام، بااثر شخصیات، قبائلی عمائدین اور میڈیا نمائندگان کے ساتھ ایک رابطہ اجلاس منعقد ہوا۔ اجلاس سے خطاب کرتے ہوئے وزیرِ امر بالمعروف، نہی عن المنکر و سماعتِ شکایات شیخ محمد خالد حنفی نے کہا کہ ملک سے باہر موجود چند محدود افراد نظام کے خلاف منفی پروپیگنڈا کر رہے ہیں، جن کا مقصد عوام کی فلاح نہیں بلکہ مالی مفادات کا حصول ہے۔ انہوں نے کہا کہ اس قسم کی مہمات افغانستان میں اسلامی شریعت کے نفاذ کے مقصد سے انہیں پیچھے نہیں ہٹا سکتیں۔ انہوں نے مزید کہا کہ امر بالمعروف و نہی عن المنکر کا قانون مختلف مراحل سے گزرنے اور مکمل باریک بینی کے ساتھ جائزہ لینے کے بعد توثیق کیا گیا ہے۔ ان کے بقول اگر کوئی شخص اس قانون میں ایسی کوئی شق ثابت کر دے جو اسلامی شریعت سے متصادم ہو، تو وزارت اس کی جواب دہ ہو گی۔ شیخ محمد خالد حنفی نے یقین دہانی کرائی کہ وزارت کے دروازے عوام کے لیے کھلے ہیں اور تمام درخواستوں، شکایات اور تجاویز کو سنجیدگی سے سنا اور ان کا جائزہ لیا جاتا ہے۔ انہوں نے کہا کہ افغان عوام گزشتہ نصف صدی سے جسمانی، فکری اور اعتقادی حملوں کا سامنا کرتے رہے ہیں اور انہیں قومیت، علاقائی اور گروہی بنیادوں پر تقسیم کیا گیا، تاہم اب ان زخموں کے مداوا کا وقت آ گیا ہے۔ اجلاس میں مرکزی زون کے علمائے کرام، بااثر شخصیات اور قبائلی مشران نے بھی امارت اسلامیہ کی مکمل حمایت کا اظہار کرتے ہوئے عزم ظاہر کیا کہ شرعی قوانین کے نفاذ میں ہر ممکن تعاون جاری رکھیں گے۔ انہوں نے اپنی تجاویز اور مطالبات بھی وزارت کی قیادت کے سامنے پیش کیے۔
ٹیکسوں میں کمی
نائب وزیر اعظم برائے انتظامی امور مولوی عبدالسلام حنفی نے قانونی اداروں، افراد، سامان کی نقل و حمل، اور تیل اور گیس کی درآمدات سمیت متعدد زمروں کے لیے 50 فیصد تک ٹیکسوں میں کمی کا اعلان کیا ہے۔ گورنمنٹ میڈیا اینڈ انفارمیشن سینٹر میں ایک پریس کانفرنس سے خطاب کرتے ہوئے، حنفی نے کہا کہ ٹیکس چھوٹ 10 سے 50 فیصد تک ہو گی اور اس کا اطلاق چار زمروں پر ہو گا: قانونی اداروں، افراد، سامان کی نقل و حمل، اور پٹرولیم اور گیس کی درآمدات۔ انہوں نے مزید کہا کہ ایک لاکھ بیس ہزار افغانی تک کی ماہانہ آمدنی والے افراد کو اب ٹیکس کی ادائیگی سے مکمل استثنیٰ حاصل ہو گا۔ یہ اقدام ٹیکس میں ریلیف فراہم کرنے اور کاروبار اور شہریوں کے لیے زیادہ سے زیادہ مالی مدد فراہم کرنے کے لیے حکومت کی اعلان کردہ کوششوں کا حصہ ہے۔
ترقیاتی منصوبوں کی منظوری
24 مئی اقتصادی امور کے نائب وزیر اعظم ملا عبدالغنی برادر اخوند کی سربراہی میں نیشنل پروکیورمنٹ کمیشن نے اپنے اجلاس کے دوران 4.2 بلین افغانی مالیت کے 15 ترقیاتی منصوبوں کی منظوری دی۔ بیان کے مطابق کل 31 منصوبے منظوری کے لیے پیش کیے گئے، بحث کے بعد 15 منصوبوں کی منظوری دی گئی جب کہ 7 کو ترامیم اور نظرثانی کے لیے بھیج دیا گیا۔ منظور شدہ اور ترمیم شدہ منصوبوں میں صوبہ غزنی میں زردالو ڈیم کے لیے جیو ٹیکنیکل اسٹڈیز کی تکمیل، صوبہ بلخ میں ہیراتان پورٹ پر 14 کلومیٹر سڑک کی تعمیر، اور کابل لوگر ہائی وے کے پہلے حصے سے سنگ نوشتہ تک سڑک کی تعمیر شامل ہے۔ ان منصوبوں میں صوبہ فاریاب کے لولاش اضلاع، غزنی کے اندڑ، صوبہ دائی کنڈی میں کجران، صوبہ بادغیس میں بالا مرغاب، صوبہ بامیان میں کہمرد اور صوبہ خوست میں موسیٰ خیل میں سرکاری ہسپتالوں کی تعمیر بھی شامل ہے۔
24 جون کو ہونے اجلاس میں نیشنل پروکیورمنٹ کمیشن نے تقریباً 3.5 بلین افغانی مالیت کے 16 ترقیاتی منصوبوں کی منظوری دی ہے۔ جاری بیان کے مطابق 40 منصوبے منظوری کے لیے پیش کیے گئے۔ بحث کے بعد 16 کی منظوری دی گئی جب کہ 20 کو ترامیم کے لیے بھیج دیا گیا۔ منظور شدہ اور ترمیم شدہ منصوبوں میں صوبہ بادغیس میں قادس خوردک واٹر ڈیم کی تعمیر، صوبہ بغلان میں کیلاگی ڈیم کے لیے جیو ٹیکنیکل اسٹڈیز، اور صوبہ پکتیکا میں 600 میٹرک ٹن کے کولڈ اسٹوریج کی سہولت کی تکمیل شامل ہیں۔ منظور شدہ منصوبوں میں آمو دریا آئل بیسن کے لیے 10,000 ٹن تیل ذخیرہ کرنے کی سہولیات کا ڈیزائن اور تنصیب، صوبہ اروزگان کے ضلع چارچینو میں 50 بستروں پر مشتمل جنرل ہسپتال کی تعمیر، اروزگان کے صوبائی دارالحکومت ترین کوٹ میں کارگو ٹرک ٹرمینل کا قیام، کابل میں متعدد داخلی سڑکوں کی تعمیر اور بجلی کی ترسیل کے منصوبے شامل ہیں۔ منظور شدہ تمام منصوبوں کی مالی اعانت امارت اسلامیہ افغانستان کے بجٹ سے کی جائے گی۔
توانائی و آبی ذخائر
قادس خُردک ڈیم کی تعمیر
افغان صوبہ بادغیس کے ضلع قادس میں جاری ’قادس خُردک‘ ڈیم کے تعمیراتی کام میں بڑی پیش رفت ہوئی ہے، جہاں اب تک 57 فیصد کام مکمل کر لیا گیا ہے۔ 80 کروڑ افغانی کی لاگت سے تیار ہونے والے اس تزویراتی منصوبے سے 1400 ہیکٹر زرعی زمین سیراب ہوگی جو فوڈ سکیورٹی اور معاشی استحکام کو فروغ دے گا۔ اس ڈیم کا مقصد علاقے کے گرتے ہوئے واٹر لیول کو سہارا دینا اور بنجر زمینوں کو آباد کرنا ہے۔ یہ ڈیم 190 میٹر طویل اور 32 میٹر بلند دیوار پر مشتمل ہے، جس میں 21 لاکھ 70 ہزار مکعب میٹر پانی ذخیرہ کرنے کی گنجائش موجود ہو گی۔ یہ منصوبہ اگلے سال 2027ء تک مکمل ہو جائے گا۔
شین ڈنڈ نہر کی تعمیر
صوبہ ہرات کے ضلع شین ڈنڈ میں ایک نہر پر تعمیراتی کام شروع کر دیا گیا ہے۔ اس منصوبے کی لمبائی 600 میٹر ہو گی جس سے پانی کی سطح کو جمع کرنے اور نکاسی آب کے نظام کو بہتر بنایا جائے گا، سیلاب کو روکا جائے گا۔
حکام نے بتایا کہ اس منصوبے کی ابتدائی لاگت 2.8 ملین افغانی سے زائد ہے، جس کی مالی اعانت ضلع شین ڈنڈ میونسپلٹی کے ترقیاتی بجٹ سے کی جائے گی۔
توانائی کے شعبے میں ترکمانستان افغانستان تعاون
ملک کی اہم پاور سپلائی کمپنی د افغانستان برشنا شرکت (DABS) کے سی ای او ملا عبدالحق ہمکار نے ترکمانستان کے وزیر توانائی اناگیلدی سپاروف کے ساتھ دوطرفہ بجلی تعاون کو وسعت دینے پر بات چیت کی ہے۔ شائع کردہ بیان کے مطابق، ملا عبدالحق نے کہا کہ 500 کلو واٹ بجلی کی ٹرانسمیشن لائن پراجیکٹ پر کام تیزی سے جاری ہے اور توقع ہے کہ تقریباً ایک سال میں مکمل ہو جائے گا۔ ترکمان حکام نے یہ بھی کہا کہ وہ بجلی کے نئے منصوبوں کے لیے تجاویز پیش کرنے کے لیے مستقبل قریب میں کابل کا دورہ کرنے کا ارادہ رکھتے ہیں۔ بیان میں ترکمانستان کے وزیر توانائی کے حوالے سے کہا گیا ہے کہ افغانستان کے مختلف صوبوں کو بجلی کی سپلائی بغیر کسی رکاوٹ کے جاری رہے گی۔
ترکی کی کمپنی کا افغانستان میں توانائی کے شعبے میں سرمایہ کاری کا اعلان
ترکی کی NKY کمپنی کے نمائندوں نے افغانستان کے توانائی کے شعبے میں سرمایہ کاری کرنے میں دلچسپی کا اظہار کیا ہے، جس میں بجلی پیدا کرنے کی سہولیات کی بحالی اور زرعی فضلے سے توانائی کے منصوبے شامل ہیں۔ ان خیالات کا اظہار انہوں نے ملک کی اہم پاور یوٹیلیٹی کمپنی دافغانستان برشنا شرکت (DABS) کے چیف ایگزیکٹو آفیسر ملا عبدالحق ہمکار سے ملاقات کے دوران کیا۔ ترک کمپنی کے ڈپٹی ڈائریکٹر Hakan Bos نے بتایا کہ کمپنی نے تقریباً 20 ممالک میں بجلی کی پیداوار اور قابل تجدید توانائی کے منصوبوں میں سرمایہ کاری کی ہے اور اب وہ افغانستان کے بجلی کے بنیادی ڈھانچے میں سرمایہ کاری کرنے میں دلچسپی رکھتی ہے، خاص طور پر بجلی کی پیداواری سہولیات کی بحالی اور فضلے سے توانائی کے منصوبوں کی ترقی میں۔ مجوزہ سرمایہ کاری سے افغانستان کے توانائی کے شعبے کو تقویت ملے گی اور بجلی کی پائیدار پیداوار تک رسائی کو وسعت ملے گی۔
کابل میں ۱۵ کلو واٹ بجلی کے کنکشنز کا دوسرا منصوبہ مکمل
افغانستان کی سینٹرل سائلو اماراتی کمپنی نے کابل میں بجلی کے کنکشن کا دوسرا منصوبہ بھی تقریباً 2.5 ملین افغانی کی لاگت سے مکمل کر لیا ہے۔
توانائی کے پانچ سالہ ترقیاتی منصوبے کی منظوری
امارت اسلامیہ کی قیادت نے پانچ سالہ توانائی کے ترقیاتی منصوبے کی منظوری دے دی ہے جس کی توثیق اقتصادی کمیشن نے کی جس کی صدارت نائب وزیر اعظم برائے اقتصادی امور ملا عبدالغنی برادر اخوند کر رہے تھے۔ اس منصوبے میں افغانستان کے گھریلو توانائی کے وسائل پر مبنی بجلی پیدا کرنے کے 25 منصوبے، 13 جاری اور 23 نئے بجلی کی ترسیل کے منصوبے، 21 جاری اور 21 نئے سب سٹیشن منصوبے، نیز بجلی کی تقسیم کے 34 نئے منصوبے شامل ہیں۔ حکام نے کہا کہ ان منصوبوں کے نفاذ سے ملک کی توانائی کی صلاحیت میں اضافہ ہو گا، بجلی کی پیداوار اور تقسیم میں بہتری آئے گی اور درآمدی بجلی پر افغانستان کا انحصار کم ہو گا۔
افغان وفد کا ازبک توانائی تنصیبات کا دورہ
د افغانستان برشنا شرکت (DABS) کے ایک اعلیٰ سطحی وفد نے، جس کی قیادت چیف ایگزیکٹو آفیسر مولوی عبدالحق ہمکار کر رہے تھے، ایک سرکاری دورے کے حصے کے طور پر ازبکستان میں بجلی کے ساز و سامان کے کئی سر کردہ اداروں اور صنعتی تنصیبات کا دورہ کیا۔ ڈی اے بی ایس کے مطابق، اس دورے کا مقصد افغانستان کے پاور سیکٹر کو جدید بنانے اور دونوں ممالک کے درمیان تکنیکی تعاون کو وسعت دینے کے لیے ازبکستان کی بجلی کے آلات کی پیداواری سہولیات اور سمارٹ بجلی کے نظام کا مطالعہ کرنا تھا۔ بیان میں کہا گیا ہے کہ وفد کو پاور ٹرانسمیشن، بجلی کی تقسیم، سمارٹ گرڈ مینجمنٹ اور توانائی کے نقصان میں کمی کی جدید ٹیکنالوجیز اور طریقوں سے متعارف کرایا گیا۔ ڈی اے بی ایس نے مزید کہا کہ دورے کے دوران حاصل ہونے والے علم اور تجربے کا استعمال افغانستان کے بجلی کے بنیادی ڈھانچے کو مضبوط کرنے، برقی آلات کے معیار کو بہتر بنانے اور پورے ملک میں سمارٹ پاور سسٹم کے استعمال کو بڑھانے کے لیے کیا جائے گا۔
ملا برادر نے میرویس عزیزی کے اربوں ڈالر کے بجلی کے منصوبوں کا جائزہ لیا
نائب وزیراعظم برائے اقتصادی امور ملا عبدالغنی برادر اخوند نے افغان سرمایہ کار میرویس عزیزی اور ان کی تکنیکی ٹیم سے ملاقات کی جس میں ملک بھر میں بجلی پیدا کرنے کے بڑے منصوبوں پر عمل درآمد پر تبادلہ خیال کیا۔ ڈپٹی وزیراعظم آفس کے مطابق عزیزی نے کہا کہ عزیزی انرجی کی انویسٹمنٹ کمپنی نے 10 ہزار میگاواٹ بجلی پیدا کرنے کے لیے درکار تمام تکنیکی آلات خرید لیے ہیں، انہوں نے مزید کہا کہ آلات کی افغانستان منتقلی کا عمل جلد شروع ہو جائے گا۔ حکومتی اداروں اور عزیزی انرجی کے نمائندوں پر مشتمل ایک مشترکہ تکنیکی کمیٹی نے یہ بھی اطلاع دی کہ صوبہ کابل میں 100 میگا واٹ کے شمسی توانائی کے منصوبے، صوبہ پروان کے شہر باریکاب میں 100 میگا واٹ کے ایک اور سولر پراجیکٹ اور صوبہ غزنی میں 131 میگا واٹ کے سولر پراجیکٹ کے لیے فزیبلٹی اسٹڈیز مکمل کر لی گئی ہیں۔ کمیٹی نے مزید کہا کہ ان منصوبوں کے لیے بجلی کی خریداری کے معاہدوں پر دستخط ہو چکے ہیں۔ رپورٹ میں مزید بتایا گیا ہے کہ تخار صوبے میں 165 میگا واٹ کے کوئلے سے چلنے والے پاور پلانٹ، صوبہ بغلان میں 350 میگاواٹ کے کوئلے سے چلنے والے پلانٹ، ناغلو اور غزنی سب اسٹیشنوں کی تعمیر اور کابل میں تراخیل کو گرین انڈسٹری سے جوڑنے والی بجلی کی نئی ٹرانسمیشن لائن کے لیے تکنیکی جائزے جاری ہیں۔ ملاقات کے دوران، ملا برادر نے تکنیکی کمیٹی کی طرف سے ہونے والی پیش رفت کی تعریف کی اور متعلقہ اداروں کو منصوبوں پر عمل درآمد میں تیزی لانے کی ہدایت کی، ملک کے توانائی کے بنیادی ڈھانچے کو آگے بڑھانے کے لیے حکومت کے مکمل تعاون کا اعادہ کیا۔
زیر کاشت رقبے میں اضافہ
امارتِ اسلامیہ افغانستان کے ادارہ شماریات و معلومات کے مطابق 2026ء میں صوبہ ہلمند اور تخار سمیت ملک کا مجموعی زیرِ کاشت رقبہ گزشتہ سال کے مقابلے میں 10.2 فیصد اضافے کے ساتھ 30 لاکھ ہیکٹر سے تجاوز کر گیا ہے، جس میں 21 لاکھ ہیکٹر آبی اور 8 لاکھ 74 ہزار ہیکٹر بارانی زمین شامل ہے۔ حکام کا کہنا ہے کہ رقبے میں یہ نمایاں توسیع بنیادی طور پر بروقت بارشوں، گلیشیئرز کے پگھلاؤ اور مجموعی طور پر سازگار ماحولیاتی حالات کا نتیجہ ہے۔ ادارہ شماریات نے صوبائی تفصیلات بتاتے ہوئے کہا کہ ملک بھر میں سب سے زیادہ آبی اراضی صوبہ ہلمند میں ریکارڈ کی گئی ہے، جہاں آبی راستوں کی وجہ سے زراعت کو فروغ مل رہا ہے، جب کہ بارانی کاشت کاری کا سب سے بڑا مرکز شمالی صوبہ تخار ثابت ہوا ہے۔ اس ڈیٹا کو جدید ترین ریموٹ سنسنگ ٹیکنالوجی، سیٹلائٹ تصاویر اور جغرافیائی معلوماتی نظام (GIS) کے ذریعے تیار کیا گیا ہے۔ یہ ڈیٹا ہر سال باقاعدگی سے جاری کیا جاتا ہے، تاکہ زرعی شعبے میں مستقبل کی منصوبہ بندی اور فوڈ سکیورٹی کے حوالے سے درست فیصلے کیے جا سکیں۔
نقل و حمل
ہائی ویز اور سڑکوں کی بحالی کے 74 منصوبے
نائب وزیر اعظم کے دفتر برائے اقتصادی امور نے ایک بیان میں کہا ہے کہ وزارت تعمیرات عامہ اس وقت ملک کے مختلف صوبوں میں 74 ہائی وے اور سڑکوں کی تعمیر اور بحالی کے منصوبوں پر کام کر رہی ہے۔ بیان کے مطابق، ان منصوبوں پر عمل درآمد سے تقریباً بیس ہزار پانچ سو چھیانوے (۲۰،۵۹۶) افراد کے لیے براہ راست اور ایک لاکھ بارہ ہزار (۱۱۲،۰۰۰)سے زیادہ لوگوں کے لیے بالواسطہ ملازمتوں کے مواقع پیدا ہوئے ہیں۔ اس کے علاوہ، منصوبوں میں، مختلف شعبوں میں تقریباً نو ہزار چار سو ترانوے (۹،۴۹۳) گاڑیاں اور بھاری مشینیں استعمال کی جا رہی ہیں۔ بیان میں کئی بڑے بنیادی ڈھانچے کے منصوبوں کی نشاندہی کی گئی ہے جن میں فی الحال کابل غزنی ہائی وے کی دوسری لین، سالنگ ہائی وے، کنڑ نورستان روڈ، دشت آرچی قندوز روڈ، قندھار سپن بولدک ہائی وے، میمنہ فریاب روڈ، قندھار ہلمند ہائی وے، بدشپہ روڈ اور بدرنگ روڈ شامل ہیں۔ حکام نے بتایا کہ ان منصوبوں کے بنیادی اہداف ملک کے نقل و حمل کے نیٹ ورک کو بہتر بنانا، سفر اور تجارت کو آسان بنانا اور پورے افغانستان میں اقتصادی سرگرمیوں کو مضبوط بنانا ہے۔
Mil-78ابو نصر فراہی ہائی وے کی تعمیر
افغانستان میں ایران کے سفیر علی رضا بگدیلی کا کہنا ہے کہ ’’Mil-78 ابو نصر فراہی‘‘ ہائی وے کا دوسرا سیکشن جو کہ افغانستان کو ایران سے ملاتا ہے، اگلے دو ماہ کے اندر مکمل کر کے کھول دیا جائے گا۔ سفیر نے کہا کہ سڑک کے دوسرے مرحلے کے لیے، جو کہ 53 کلو میٹر طویل ہے، ایران کی طرف سے مالی اعانت فراہم کی جا رہی ہے۔ اب تک 42 کلومیٹر مکمل ہو چکے ہیں، باقی 11 کلومیٹر پر تعمیراتی کام جاری ہے۔ انہوں نے مزید کہا کہ سڑک کا پہلا مرحلہ، جس کی پیمائش 64 کلومیٹر تھی، پہلے ایرانی تعاون سے مکمل کی گئی تھی، اور اب تباہ شدہ حصوں کی مرمت کے لیے فنڈز مختص کیے گئے ہیں۔ ’’Mil-78 ابو نصر فراہی‘‘ شاہراہ کل 117 کلومیٹر پر محیط ہے اور اسے افغانستان اور ایران کے درمیان تجارت اور ٹرانزٹ کا ایک اہم راستہ سمجھا جاتا ہے۔
بلخ میں کارگو ٹرمینل کی تعمیر
نقل و حمل اور شہری ہوا بازی کی وزارت نے ایک بیان میں کہا کہ بلخ میں 850 ملین افغانی مالیت کے جدید کارگو ٹرمینل کی تعمیر کا با ضابطہ آغاز ہو گیا ہے۔ یہ کارگو ٹرمینل پبلک پرائیویٹ پارٹنرشپ کے ذریعے ’’ہیرتان کراسنگ‘‘ کے علاقے میں تعمیر کیا جائے گا۔ یہ منصوبہ ایک ہزار جریب اراضی کا احاطہ کرے گا اور اس میں دو منزلہ عمارت، پارکنگ ایریاز اور گاڑیوں کی مرمت کی سہولیات، انتظامی دفاتر اور دیگر ضروری انفراسٹرکچر شامل ہیں۔ حکام نے کہا کہ ہیرتان کرسنگ کارگو ٹرمینل کی تعمیر دو سال کے اندر مکمل ہونے کی امید ہے۔ ٹرانسپورٹ اور سول ایوی ایشن کی وزارت کا کہنا ہے کہ وہ نہ صرف افغانستان کے فضائی اور زمینی نقل و حمل کے شعبوں کے انتظام پر کام کر رہی ہے بلکہ ملک بھر میں متعلقہ بنیادی ڈھانچے کو بہتر بنانے پر بھی کام کر رہی ہے۔
نیاب آباد سٹیشن پر نئی ریلوے لائن اور سٹوریج ہاؤس کی تعمیر
نائب وزیر اعظم کے دفتر کے ایک بیان کے مطابق، ازبک حکام نے نیاب آباد اسٹیشن پر ایک نئی 1.5 کلومیٹر طویل ریلوے لائن تعمیر کرنے کے منصوبے کا اظہار کیا، اس کے ساتھ ساتھ ٹریک کے ساتھ سامان کی لوڈنگ اور ان لوڈنگ کے لیے کئی گودام بھی بنائے جائیں گے۔ افغان حکومت کی جانب اس اقدام کا خیر مقدم کیا اور افغانستان کی وزارت تعمیرات عامہ کے حکام کو ہدایت کی کہ وہ ازبک فریق کے ساتھ مشترکہ طور پر تکنیکی اور تعمیراتی کام کو مربوط کریں۔ بیان کے مطابق، نئی ریلوے لائن اور اسٹوریج کی سہولیات سے ہیرتان ڈرائی پورٹ کی صلاحیت میں اضافہ اور تاجروں کے لیے تجارت سے متعلقہ خدمات اور رسد میں بہتری کی توقع ہے۔
صوبہ روزگان میں مال بردار ٹرکوں کے ٹرمینل کی تعمیر
وزیراعظم ملا عبدالغنی برادر اخوند کی سربراہی میں منعقدہ تدارکات کمیشن کے حالیہ اجلاس میں متعدد ترقیاتی منصوبوں کے ساتھ روزگان میں مال بردار ٹرکوں کے ٹرمینل کی تعمیر کی منظوری بھی دی گئی۔ یہ ٹرمینل زمینی ٹرانسپورٹ کے منظور شدہ معیارات کے مطابق 200 جریب اراضی پر تعمیر کیا جائے گا، جہاں ایک وقت میں درجنوں بڑے مال بردار ٹرکوں کی پارکنگ کی گنجائش ہو گی۔ منصوبے پر 65 ملین افغانی لاگت آئے گی۔ ٹرمینل میں ڈرائیوروں کے لیے ضروری سہولیات، پارکنگ، پانی کی فراہمی، بجلی کا نظام، مسجد، وضو خانہ، ریسٹورنٹ، ورکشاپ اور دیگر بنیادی سہولتیں بھی قائم کی جائیں گی۔ منصوبہ 12 ماہ میں مکمل کیا جائے گا۔
درآمدات و برآمدات
درآمدات اور برآمدات کا حجم
اعداد و شمار کے مطابق مئی تا جون ملک کے ریلوے نیٹ ورک کے ذریعے کل سات لاکھ ستانوے ہزار چار سو بیاسی (797،482) میٹرک ٹن پیٹرولیم مصنوعات، نان پیٹرولیم اشیاء اور دیگر اجناس درآمد اور برآمد کی گئیں۔ وزارت تعمیرات عامہ کے ترجمان محمد اشرف حقینس کے مطابق، پانچ لاکھ اڑتیس ہزار آٹھ سو نواسی (538،889) میٹرک ٹن ہیرتان ڈرائی پورٹ کے ذریعے، ۷۵ ہزار سات سو بائیس (75,722) میٹرک ٹن اقینا کے ذریعے، ستتر ہزار آٹھ ( 77,008) میٹرک ٹن تور غنڈی کے ذریعے اور ایک لاکھ پانچ ہزار آٹھ سو تریسٹھ (105,863) میٹرک ٹن ریلوے لائن کے ذریعے پہنچایا گیا۔ اسی عرصے کے دوران مجموعی طور پر دو ہزار پانچ سو سترہ ( 2,517) میٹرک ٹن برآمدات بھی کی گئیں۔ وزارت نے کہا کہ ریلوے کی نقل و حمل اور برآمدات میں اضافہ روزگار کے مواقع پیدا کرنے، قومی محصولات کو بڑھانے اور افغانستان میں اقتصادی ترقی کو سہارا دینے میں اہم کردار ادا کرتا ہے۔
خشک میوہ جات کی برآمدات
قندھار کے محکمہ زراعت، آب پاشی اور لائیو اسٹاک کے حکام کے مطابق اس سال کے دوران مجموعی طور پر ایک لاکھ 82 ہزار 381 میٹرک ٹن تازہ اور خشک میوہ جات دنیا کے مختلف ممالک کو برآمد کیے گئے ہیں۔ ان برآمدات کی مجموعی مالیت 42 کروڑ 88 لاکھ 63 ہزار امریکی ڈالرز ریکارڈ کی گئی ہے۔
حکام کے مطابق قندھار کی ان معیاری مصنوعات کو دنیا کے بہترین بازاروں تک پہنچایا گیا ہے، جن میں بھارت، قطر، روس، چین، متحدہ عرب امارات، برطانیہ، ملائیشیا، کینیڈا، ترکی، عراق، بنگلہ دیش، ویت نام اور جرمنی شامل ہیں۔ قندھار کے انار، انگور اور خشک میوہ جات اپنی مٹھاس اور معیار کی وجہ سے عالمی سطح پر اپنی شناخت بنا چکے ہیں۔ فضائی راہ داریوں (Air Corridors) کی بحالی اور زمینی راستوں پر کسٹم کے بہتر نظام نے برآمد کنندگان کا اعتماد بحال کیا ہے، جس کی وجہ سے برآمدات کے حجم میں نمایاں اضافہ دیکھنے میں آیا ہے۔ ماہرین کی رائے ہے کہ اگر برآمدات کے لیے پیکنگ اور پراسیسنگ کے جدید پلانٹس مقامی سطح پر لگائے جائیں تو ان مصنوعات کی قیمت اور طلب میں مزید کئی گنا اضافہ کیا جا سکتا ہے۔
ہرات سے ہاتھ سے بنے ہوئے قالین جرمنی برآمد کیے گئے
ہرات کے صوبائی حکام کا کہنا ہے کہ رواں سال کے آغاز سے اب تک دس ہزار مربع میٹر سے زائد ہاتھ سے بنے ہوئے قالین جرمنی کو برآمد کیے گئے ہیں، جن کی کل مالیت ایک لاکھ تین ہزار ڈالر بنتی ہے۔ ہرات کے گورنر کے دفتر سے جاری ایک بیان کے مطابق قالین کی صنعت کو سپورٹ کرنا، پیداوار میں سہولت فراہم کرنا، اور مقامی اور بین الاقوامی منڈیوں تک رسائی کو بڑھانا صوبائی انتظامیہ کی اہم ترجیحات میں شامل ہیں۔
قالین کی صنعت ہرات کے اہم ترین اقتصادی شعبوں میں سے ایک ہے، جو مقامی آمدنی میں نمایاں کردار ادا کر رہی ہے جبکہ ہزاروں لوگوں کو براہ راست اور بالواسطہ روزگار کے مواقع فراہم کرتی ہے۔
معدنی پتھروں کی پہلی کھیپ امریکہ کو برآمد کی گئی
ہرات کے صوبائی حکام نے کہا کہ افغانستان کی معدنی مصنوعات کی پہلی برآمدی کھیپ، جس کی مالیت ایک لاکھ امریکی ڈالر ہے، ہرات سے امریکہ کو برآمد کی گئی۔ ہرات کے گورنر کے میڈیا آفس کے مطابق، یہ کھیپ کالے معدنی پتھروں پر مشتمل ہے جسے ضلع زیندا جان میں ایک کان سے نکالا گیا اور ہرات چیمبر آف انڈسٹریز کے ذریعے امریکی مارکیٹ میں برآمد کیا گیا۔
صوبائی حکام نے اس کھیپ کو افغانستان کی معدنی برآمدات کو بڑھانے اور بین الاقوامی منڈیوں میں ملک کی موجودگی کو مضبوط بنانے کی جانب ایک اہم قدم قرار دیا۔
چھبیس ہزار ٹن سے زائد مائع گیس افغان مارکیٹ میں پہنچائی گئی
افغانستان کی اسٹیٹ آئل اینڈ گیس کمپنی کا کہنا ہے کہ 26،492 ٹن مائع پیٹرولیم گیس (LPG) گزشتہ چھ دنوں کے دوران اسلام قلعہ، ہیرتان، تورغنڈی، Mil-78، اکینا اور نمروز کی سرحدی گزر گاہوں کے ذریعے مقامی مارکیٹ کو درآمد اور سپلائی کی گئی۔ کمپنی کے مطابق، اسی عرصے کے دوران ملک کی طلب کا تخمینہ 21،948 ٹن تھا، یعنی مارکیٹ میں متوقع ضرورت سے 4،544 ٹن زیادہ سپلائی کی گئی۔ کمپنی نے کہا کہ ایل پی جی کی زیادہ تر درآمدات اسلام قلعہ، ہیرتان اور تورغنڈی بارڈر کراسنگ کے ذریعے ملک میں داخل ہوئیں، انہوں نے مزید کہا کہ ان ڈرائی پورٹس کے جاری آپریشن نے ملکی طلب کو پورا کرنے اور مستحکم سپلائی کو برقرار رکھنے میں کلیدی کردار ادا کیا ہے۔ اسٹیٹ آئل اینڈ گیس کمپنی نے کہا کہ وہ ایل پی جی کی درآمدات، ذخیرہ کرنے کی سطح اور مارکیٹ کے حالات پر کڑی نظر رکھے ہوئے ہے، عوام سے ایندھن کی مارکیٹ سے متعلق معلومات کے لیے صرف سرکاری ذرائع پر انحصار کرنے کی تاکید کرتی ہے۔
ملکی پیداوار کے تحفظ کے لیے درآمدی ٹیرف میں ترمیم
وزارت خزانہ کی جانب سے گھریلو پیداوار، زراعت اور تجارت کو سپورٹ کرنے کی کوششوں کے حصے کے طور پر متعدد اشیا پر درآمدی ٹیرف میں ترمیم کی گئی ہے۔ وزارت کی جانب سے جاری کردہ بیان کے مطابق نئے اقدامات کے تحت زیتون پر درآمدی ٹیرف ایک فیصد سے بڑھا کر 2.5 فیصد کر دیا گیا ہے، جب کہ شوگر کیوبز پر ٹیرف 3.5 فیصد سے بڑھا کر 10 فیصد کر دیا گیا ہے اور فروٹ سیرپ پر ٹیرف 60 فیصد سے کم کر کے 20 فیصد کر دیا گیا ہے۔ وزارت نے کہا کہ یہ ایڈجسٹمنٹ پالیسیوں کے مطابق متعارف کرائی گئی ہیں جن کا مقصد گھریلو صنعتوں کے تحفظ، مقامی زرعی پیداوار کو فروغ دینا اور تجارت کو آسان بنانا ہے۔ بیان میں مزید کہا گیا ہے کہ کمیٹی نے خام لوہے کے سامان، کاغذ، لوہے کی جالی کی مصنوعات، طبی آلات اور پولیمر مواد پر ٹیرف کے معیار کے بارے میں بھی فیصلے کیے ہیں۔ اس سال کے شروع میں، ٹیرف کمیٹی نے اقتصادی تحفظ کے وسیع تر اقدامات کے حصے کے طور پر سات دیگر درآمدی اشیا پر ڈیوٹی میں اضافے کی منظوری دی۔
سرحدی پورٹس پر انتظامی کمپلیکس کی تعمیرات
افغانستان کی سٹینڈرڈز اینڈ کوالٹی اتھارٹی (ASQA) نے ملک بھر میں نو سرحدی بندر گاہوں پر انتظامی کمپلیکس کی تعمیر کے لیے “TCRC” کمپنی کے ساتھ 46 ملین ڈالر کے معاہدے پر دستخط کیے ہیں۔ معاہدے کے تحت کمپنی کمپلیکس کے لیے تین شعبوں بجلی، تعمیرات اور لیبارٹری کی سہولیات فراہم کرنے کی ذمہ دار ہو گی۔ کمپنی سٹینڈرڈز اینڈ کوالٹی اتھارٹی کے ملازمین کے لیے افغانستان کے اندر اور باہر دونوں جگہ صلاحیت سازی کے مواقع بھی فراہم کرے گی۔ اتھارٹی کے عہدیداروں نے بتایا کہ اس منصوبے کے اگلے پانچ سالوں میں لاگو ہونے کی امید ہے۔ افغانستان علاقائی اور بین الاقوامی ممالک کے ساتھ اقتصادی اور تجارتی تعلقات کو وسعت دینے کے لیے اپنی سرحدی بندر گاہوں پر انتظامات کو معیاری بنانے کی کوششیں جاری رکھے ہوئے ہے۔ یہ بھی واضح رہے کہ کوالٹی کنٹرول کا یہ ادارہ ملک میں غیر معیاری مصنوعات کی امپورٹس کی سختی سے حوصلہ شکنی کر رہا ہے۔ حال ہی میں 748 ٹن کم معیار کا سیمنٹ لے جانے والی 11 ریلوے ویگنوں کو ہیراتان پورٹ بارڈر کراسنگ کے ذریعے ملک میں داخل ہونے کے بعد مسترد کر دیا گیا۔ اتھارٹی کے مطابق، لیبارٹری ٹیسٹنگ اور معائنے سے معلوم ہوا کہ کھیپ سٹینڈرڈ کوالٹی کے تقاضوں کو پورا کرنے میں ناکام رہی اور اسے واپس کر دیا گیا۔ اس کے علاوہ اسلام قلعہ بارڈر کراسنگ پر کم معیار کے تعمیراتی اور بجلی کے سامان کی دو کھیپیں ملکی معیار پر پورا نہ اترنے پر مسترد کر دی گئیں۔ اس کارگو میں 35,200 کلو گرام کالا سیمنٹ اور 20,060 کلوگرام شمسی آلات شامل تھے۔ مسترد شدہ سامان برآمد کرنے والے ملک کو واپس کر دیا گیا۔
شیر خان پورٹ کی گنجائش میں توسیع
اقتصادی کمیشن نے تاجکستان، کرغزستان اور چین کے ساتھ تجارت کو مضبوط بنانے کے لیے شیر خان پورٹ کی صلاحیت کو بڑھانے کے منصوبے کی منظوری دی ہے۔ اجلاس کے دوران کمیشن نے پورٹ کے بنیادی ڈھانچے کو وسعت دینے، تاجکستان کے ساتھ مل کر شیر خان پورٹ کے کام کے اوقات میں توسیع اور نئے لاجسٹک سینٹر کی تعمیر کے لیے فنڈز مختص کرنے کے اقدامات کی منظوری دی۔ کمیشن نے وزارت تعمیرات عامہ کو افغانستان کے اندر ای سی او ریلوے کوریڈور کو فعال کرنے کے لیے ضروری سہولیات کے قیام کا کام بھی سونپا۔ اس کے علاوہ سرکاری بنیادی ڈھانچے کے منصوبوں میں استعمال کیے جانے والے معیاری ری انفورسنگ اسٹیل بارز (ریبار) کی تیاری کے لیے کئی سرکاری اداروں سے سکریپ میٹل کی نیشنل ڈیولپمنٹ کمپنی کو منتقلی کی منظوری دی۔ کمیشن نے مزید 37 قومی معیارات اور اسٹینڈرڈز اینڈ کوالٹی اتھارٹی کے ذریعہ پیش کردہ 12 مجوزہ جانچ کے طریقوں کی منظوری دی۔
کان کنی
قندوز گولڈ مائننگ کا معاہدہ
مائننگ اور پیٹرولیم کی وزارت نے قندوز میں ایک افغان اور آذربائیجانی کمپنی کے ساتھ 20 ملین ڈالر سے زائد مالیت کے سونے کی کان کنی کے 5 سالہ معاہدے پر دستخط کیے ہیں۔ سرمایہ کاری کرنے والی کمپنی نے 30 فیصد رائلٹی ادا کرنے اور سماجی خدمات کے منصوبوں پر اضافی دو لاکھ ڈالر خرچ کرنے کا وعدہ کیا ہے۔ کانوں اور پیٹرولیم کی وزارت نے کہا کہ ایک بار منصوبے کے شروع ہونے کے بعد اس منصوبے سے 100 کے قریب براہ راست اور بالواسطہ ملازمتیں پیدا ہونے کی امید ہے۔
فاریاب میں پولی میٹل کان کا معاہدہ
مائننگ اور پیٹرولیم کی وزارت نے جولائی میں صوبہ فاریاب میں پولی میٹل کان نکالنے کے لیے ۲۴ ملین ڈالر کے ایک معاہدے پر دستخط کیے ہیں۔
قیمتی پتھروں کی فروخت
کان کنی کے مقامی حکام نے تصدیق کی کہ افغانستان کے صوبہ نورستان میں کانوں سے نکالے گئے قیمتی پتھروں کو 52 ملین افغانی سے زائد رقم میں فروخت کیا گیا ہے۔ مولوی سید رحیم عمیر نے ہفتے کے روز کہا کہ فروخت ہونے والے قیمتی پتھروں میں فیروزی، کنزائٹ اور مورگنائٹ شامل ہیں۔ حکام کے مطابق یہ پتھر نورستان کے ضلع دوآب میں ماوی کان کنی کے علاقے سے نکالے گئے تھے۔ شائع شدہ اعداد و شمار کی بنیاد پر، کل آمدنی کا 10 فیصد، تقریباً 5.2 ملین افغانی، سرکاری خزانے میں جمع کرایا گیا ہے۔ صوبائی مائنز اینڈ پیٹرولیم ڈیپارٹمنٹ کے سربراہ نے بتایا کہ قیمتی پتھروں کو کھلی بولی کے عمل کے ذریعے مقامی تاجروں کو فروخت کیا گیا۔ افغانستان کے قیمتی اور نیم قیمتی پتھروں کو نکالنے اور فروخت کرنے کا کام اس وقت شفاف معاہدوں اور عوامی نیلامی کے تحت کیا جا رہا ہے۔
شاباشک میں کوئلے کی پیداوار
جنرل ڈائریکٹوریٹ آف اسٹیٹ اونرڈ انٹرپرائزز نے کہا ہے کہ شاباشک کوئلے کی کانیں تکنیکی معیارات اور ضروریات کے مطابق روزانہ 200 سے 300 ٹن کوئلہ پیدا کرتی ہیں۔
ڈائریکٹوریٹ کی جانب سے جاری بیان کے مطابق شاباشک کانیں سرکاری ملکیت والی ناردرن کول کمپنی کے تحت کام کرتی ہیں، اور کمپنی کے دائرہ اختیار میں دیگر کان کنی کے علاقوں میں شکول، جیہون اور کرمل شامل ہیں۔ بیان کے مطابق ان کانوں سے نکالے گئے کوئلے کی کیلوریفک ویلیو چھ ہزار سے ساڑھے چھ ہزار کلو کیلوریز تک ہوتی ہے جو کہ اعلیٰ معیار کے توانائی کے وسائل کی نشاندہی کرتی ہے۔ ڈائریکٹوریٹ نے مزید کہا کہ ان کانوں سے پیدا ہونے والا کوئلہ، اپنی زیادہ حرارتی قیمت اور طویل عرصے تک جلنے کے وقت کی وجہ سے، مارکیٹ کی طلب کو پورا کرنے اور مستحکم، قابل بھروسہ سپلائی کے ذریعے ملک کی اقتصادی ترقی کو سہارا دینے میں اہم کردار ادا کرتا ہے۔
ہرات میں نمک کی کان کنی کے معاہدے
وزارتِ معدنیات و پٹرولیم نے صوبہ ہرات کے ضلع غوریان میں نمک کی کان کنی کا ’’عبدالحمید فیضی مائننگ اینڈ پروسیسنگ کمپنی‘‘ کے ساتھ 15 سالہ معاہدہ کیا ہے۔ جس کے تحت 54 لاکھ ڈالرز سے زائد کی سرمایہ کاری کی جائے گی۔ وزیرِ معدنیات مولوی ہدایت اللہ بدری نے بتایا کہ حکومت کو فی ٹن 1500 افغانی رائلٹی ادا کی جائے گی اور معاہدے کی ایک اہم شق کے تحت نجی کمپنی پابند ہو گی کہ وہ 3 لاکھ 50 ہزار امریکی ڈالرز سماجی خدمات اور عوامی فلاح و بہبود کے منصوبوں پر خرچ کرے۔ ایک اور بیس ملین ڈالر سے زائد کے معاہدے پر مائنز اینڈ پیٹرولیم کے وزیر ملا ہدایت اللہ بدری نے ریڈ گولڈ ایشیا کے مابین دستخط ہوئے۔ یہ معاہدہ 15 سال کی مدت کے لیے دیا گیا ہے، جس کی رائلٹی کی شرح 1500 افغانی فی ٹن نکالے گئے نمک کی ہے۔ رائلٹی کی ادائیگیوں کے علاوہ، کمپنی نے کمیونٹی ڈویلپمنٹ اور سماجی خدمات کے منصوبوں میں نو لاکھ تیس ہزار ڈالر کی سرمایہ کاری کرنے کا عہد کیا ہے۔ اس منصوبے سے علاقے میں تقریباً 100 لوگوں کے لیے روزگار کے مواقع بھی پیدا ہونے کی امید ہے۔ ان منصوبوں سے نہ صرف نمک کی مقامی ضرورت پوری ہو گی، بلکہ اسے عالمی معیار کے مطابق پراسیس کر کے برآمد کرنے کی راہ بھی ہموار ہو گی۔
صنعت و تجارت
ایران، افغانستان اور چین کا سہ فریقی آزاد تجارتی اور صنعتی زون کا منصوبہ
ایرانی حکام کا کہنا ہے کہ اس وقت ایران، افغانستان اور چین پر مشتمل مشترکہ آزاد تجارتی اور صنعتی زون کے قیام کا انتظامی عمل جاری ہے۔جنوبی خراسان صوبے میں اقتصادی اور مالیاتی امور کے سربراہ مرتضی زکریان کے مطابق، یہ تجویز تینوں ممالک کے جغرافیائی، اقتصادی اور ٹرانزٹ فوائد پر مبنی ہے اور اس کا مقصد نجی شعبے کی مدد سے علاقائی اقتصادی تعاون کو بڑھانا ہے۔ چینی اقتصادی وفد سے ملاقات کے دوران زکریان نے کہا کہ ایران انفراسٹرکچر، افرادی قوت اور صنعتی صلاحیت میں حصہ ڈالے گا، چین سرمایہ کاری، فنانسنگ اور ٹیکنالوجی کی منتقلی فراہم کرے گا جبکہ افغانستان اپنے وسیع معدنی وسائل، دھاتوں اور اسٹریٹجک ٹرانزٹ مقام کے ذریعے کلیدی کردار ادا کرے گا۔
کابل اور انقرہ کے مابین تجارت میں توسیع اور افغان تاجروں کے لیے آسان ویزا تک رسائی
وزیر زراعت، آبپاشی اور لائیو سٹاک مولوی عطاء اللہ عمری نے ترکیہ کے ناظم الامور سعدین یلدیز سے ملاقات کی جس میں زراعت، تجارت اور سرمایہ کاری میں دو طرفہ تعاون کو وسعت دینے پر تبادلہ خیال کیا۔ وزارت کے مطابق، ملاقات میں تجارتی تعلقات کو مضبوط بنانے، افغان زرعی مصنوعات کی برآمدات بڑھانے اور افغان تاجروں اور مریضوں کے لیے ویزا کے عمل کو آسان بنانے پر توجہ مرکوز کی گئی۔ وزیر عمری نے کہا کہ دونوں ممالک کے تاجروں کے درمیان قریبی ہم آہنگی سے افغان زرعی مصنوعات کی ترکیہ اور وہاں سے تیسرے ملک کی منڈیوں کو برآمدات بڑھانے میں مدد ملے گی۔ دریں اثنا، یلدیز نے کہا کہ ترکیہ قابل بھروسہ اور جائز کاروباری افراد کے لیے ویزا کی سہولت فراہم کرتا ہے اور ترک تعاون اور رابطہ ایجنسی (TİKA) کے ذریعے نافذ کیے گئے ترقیاتی پروگراموں کے ذریعے افغان کسانوں کی مدد جاری رکھے ہوئے ہے۔ انہوں نے مزید کہا کہ ترکیہ نے افغانستان کی وزارت زراعت کے ساتھ بہتر بیجوں، زرعی مواد کی تقسیم اور افغان زرعی مصنوعات کی مارکیٹنگ میں بھی تعاون کر رہا ہے۔
افغانستان کرغزستان تجارتی فورم کا انعقاد
اس فورم کا انعقاد کرغزستان کے دارالحکومت بشکیک میں ہوا جس میں دونوں ممالک کے سرکاری حکام، چیمبرز آف کامرس کے نمائندوں اور نجی شعبے کے اراکین نے شرکت کی۔ دونوں فریقوں نے افغانستان اور کرغزستان کے درمیان ایک مشترکہ تجارتی کونسل کے قیام پر اتفاق کیا، جس کا مقصد دونوں ممالک کے درمیان براہ راست تجارتی تعلقات کو مضبوط بنانا اور اقتصادی تعاون کو بڑھانا ہے۔
افغان چیمبر اور چینی نمائش کمپنی کے مابین معاہدہ
افغانستان کے چیمبر آف کامرس اینڈ انویسٹمنٹ اور چین کے ’’شینگڈاؤ انٹرنیشنل ایگزیبیشن سینٹر‘‘ کے مابین دو طرفہ تجارتی تعاون کو وسعت دینے اور مشترکہ اقتصادی کانفرنسوں کے انعقاد کے لیے ایک مفاہمتی یادداشت (MoU) پر دستخط کیے گئے ہیں۔ اس نئے معاہدے کے تحت چین کے صنعتی مشینری اور جدید ترین آلات بنانے والے بڑے مینوفیکچررز افغانستان میں منعقد ہونے والی پانچویں ’’امام ابو حنیفہ قومی و بین الاقوامی نمائش‘‘ میں شرکت کریں گے۔ چینی کمپنیاں اس نمائش کے دوران افغان تاجروں اور صنعت کاروں کے سامنے اپنی جدید ترین پروڈکٹس، فیکٹری آلات اور مینوفیکچرنگ ٹیکنالوجی کا مظاہرہ کریں گی جس سے افغانستان کی اُبھرتی ہوئی مقامی انڈسٹری کو جدید خطوط پر استوار ہونے میں مدد ملے گی۔
افغانستان قازقستان مشترکہ نمائش اور تجارتی معاہدے
وزارت صنعت و تجارت کا کہنا ہے کہ افغانستان اور قازقستان کے نجی شعبوں کے درمیان افغان اور قازق مصنوعات کی مشترکہ نمائش اور دو طرفہ کاروباری ملاقاتوں کے سلسلے کے بعد 25 تعاون کے معاہدوں پر دستخط کیے گئے ہیں۔ وزارت کے مطابق، معاہدوں میں دواسازی، سبزیوں، تازہ اور خشک میوہ جات، آٹا، گندم اور خوردنی تیل کی درآمد اور برآمد کے ساتھ ساتھ بینکنگ سیکٹر میں تعاون شامل ہے۔
ازبکستان کے تجارتی وفد کی آمد
سہروب عبدالرحمنوف کی قیادت میں ازبکستان کے 70 رکنی تجارتی اور صنعتی وفد نے جلال آباد میں ننگرہار کے گورنر محمد نعیم اخوند سے ملاقات کے دوران تجارتی تعلقات کو وسعت دینے اور مشترکہ اقتصادی تعاون کو مضبوط بنانے پر زور دیا۔
افغانستان اور ازبکستان کے درمیان ۲۰۰ ملین ڈالر کے تجارتی معاہدوں پر دستخط
افغانستان اور ازبکستان نے کابل میں منعقدہ افغان ازبک بزنس فورم کے دوران 200 ملین ڈالر سے زائد مالیت کے 22 تجارتی معاہدوں پر دستخط کیے۔ افغانستان کی وزارت صنعت و تجارت کے مطابق، فورم نے دونوں ممالک کے سینئر حکام اور نجی شعبے کے نمائندوں کو اکٹھا کیا۔ وزیر صنعت و تجارت نورالدین عزیزی نے ازبکستان کے ساتھ اقتصادی تعلقات کو وسعت دینے کے افغانستان کے عزم کا اعادہ کیا اور امید ظاہر کی کہ دو طرفہ تجارت 5 ارب ڈالر تک بڑھ جائے گی۔ انہوں نے افغان اور ازبک سرمایہ کاروں کو افغانستان میں سرمایہ کاری کے مواقع سے فائدہ اٹھانے کی بھی ترغیب دی۔
ازبک نائب وزیر اعظم جمشید خود جائیف نے دونوں ممالک کے درمیان اقتصادی تعاون کو مضبوط بنانے، تجارت کو آسان بنانے اور تجارتی انفراسٹرکچر کو ترقی دینے کی اہمیت پر زور دیا۔ حالیہ برسوں میں، افغانستان اور ازبکستان نے اقتصادی اور تجارتی تعلقات کو گہرا کرنے کے لیے ٹرانزٹ روابط کو وسعت دینے، سرمایہ کاری کی حوصلہ افزائی، علاقائی رابطوں کو بہتر بنانے، اور دو طرفہ تجارت میں اضافہ کرنے کے لیے کام کیا ہے۔ مشترکہ تجارتی فورم نئی تجارتی شراکت داری کو فروغ دینے کے لیے ایک اہم پلیٹ فارم کے طور پر کام کر رہے ہیں۔
افغان تاجروں کا تاشقند کا دورہ
افغانستان چیمبر آف کامرس اینڈ انویسٹمنٹ (اے سی سی آئی) کے صدر سید کریم ہاشمی تین روزہ سرکاری دورے پر 100 کے قریب افغان تاجروں اور سرمایہ کاروں کے وفد کی قیادت کرتے ہوئے ازبکستان کے دارالحکومت تاشقند روانہ ہوئے۔ چیمبر کے مطابق افغان وفد صوبہ سریدریا کے گورنر اور مقامی حکام سے ملاقات کرنے کے ساتھ ساتھ ازبک تاجر رہنماؤں اور سرمایہ کاروں کے ساتھ مشترکہ ملاقاتوں میں شرکت کرے گا تاکہ دو طرفہ تجارت کو وسعت دینے اور مشترکہ سرمایہ کاری کے مواقع تلاش کرنے پر تبادلہ خیال کیا جا سکے۔ وفد کے ایجنڈے میں صوبہ سریدریا میں مینوفیکچرنگ سہولیات کا دورہ بھی شامل ہے، جس کا مقصد اقتصادی تعاون کو مضبوط بنانا اور دونوں ممالک کے درمیان سرمایہ کاری کے نئے امکانات کا جائزہ لینا ہے۔
افغان حکام کی دبئی چیمبرز کے صدر سے ملاقات ، ائیر کوریڈور کے لیے بات چیت
دبئی میں امارت اسلامیہ افغانستان کے قونصل جنرل عبدالرحمن فدا اور کمرشل اتاشی احمد بلال نے دبئی چیمبرز کے صدر اور سی ای او محمد علی لوطہ سے ملاقات کی اور اقتصادی اور تجارتی تعاون کو مضبوط بنانے کے طریقوں پر تبادلہ خیال کیا۔ افغانستان کی وزارت صنعت و تجارت کے مطابق دونوں فریقوں نے اقتصادی تعاون کو وسعت دینے، افغانستان اور دبئی کے درمیان تجارتی حجم بڑھانے اور تجارتی تعلقات کو مزید فروغ دینے کے اقدامات پر تبادلہ خیال کیا۔ بات چیت میں افغان مصنوعات خصوصاً تازہ پھلوں کی برآمدات کو آسان بنانے کے لیے کابل اور دبئی کے درمیان براہ راست ہوائی کارگو کوریڈور کے قیام پر بھی توجہ مرکوز کی گئی، جس سے افغان تاجروں کے لیے دبئی کی بین الاقوامی تجارتی نمائشوں میں شرکت کے زیادہ مواقع پیدا کیے جائیں، اور تجارت اور سرمایہ کاری میں تعاون کو بڑھایا جائے۔ یہ ملاقات ایسے وقت میں ہوئی ہے جب افغانستان اپنی برآمدی منڈیوں کو وسعت دینے، غیر ملکی سرمایہ کاری کو راغب کرنے اور علاقائی شراکت داروں کے ساتھ اقتصادی تعلقات کو مضبوط کرنے کی کوشش کر رہا ہے۔
ننگرہار میں ملکی مصنوعات کی نمائش
وزارت صنعت و تجارت نے ملک کی پیداواری صلاحیت اور صنعتی صلاحیت کو ظاہر کرنے کے لیے صوبہ ننگرہار میں ملکی مصنوعات کی نمائش کا انعقاد کیا ۔ نمائش میں 80 بوتھس میں مقامی طور پر تیار کردہ اشیا کی ایک وسیع رینج پیش کی گئی ہے جس میں کھانے کی مصنوعات، زرعی پیداوار، قالین، دستکاری اور افغان ساختہ دیگر مصنوعات شامل ہیں۔ نمائش 12 جولائی سے 14 جولائی تک صنعتکاروں، تاجروں اور عام لوگوں کے لیے کھلی رہی۔
کابل میں صنعت اور کان کنی کی نمائش
پانچویں قومی اور بین الاقوامی صنعت اور کان کنی ہفتہ نمائش کے موقع پر منعقدہ بزنس ٹو بزنس میٹنگز کے دوران مجموعی طور پر ایک ملین ڈالر سے زائد کے 50 معاہدوں پر دستخط کیے گئے۔ نمائش کے میڈیا کوآرڈینیٹر منصور یوسف زئی نے ریڈیو امید کو بتایا کہ 328 کمپنیوں نے 36 مختلف شعبوں کی نمائندگی کرنے والے 400 سے زائد نمائشی بوتھس میں اپنی مصنوعات اور خدمات کی نمائش کی۔ یوسف زئی نے کہا کہ افغانستان آئرن سمیلٹنگ ایسوسی ایشن اور ایک ایرانی وفد کے درمیان فیکٹری کے ساز و سامان اور خام مال کی فراہمی کے لیے 10 معاہدوں پر دستخط کیے گئے۔ انہوں نے مزید کہا کہ سرکاری وفود، سفیروں، کاروباری رہنماؤں، کمپنی کے نمائندوں نے اس نمائش میں شرکت کی۔
بغلان میں چاول پراسیسنگ فیکٹری کی تعمیر
افغانستان کے شمالی صوبہ بغلان میں تقریباً 2 ملین ڈالر کی لاگت سے چاول کی پروسیسنگ فیکٹری پر تعمیراتی کام شروع ہو گیا ہے۔ بغلان کے گورنر کے پریس آفس کے ایک بیان کے مطابق، اس سہولت کا سنگ بنیاد بغلان کے مرکزی ضلع کے علاقے چم قلعہ میں ایک نئے قائم ہونے والے صنعتی پارک میں رکھا گیا۔ حکام نے کہا کہ اس منصوبے کو ملکی کمپنی ’’مبارز بارکزئی‘‘ کی طرف سے فنڈ اور تیار کیا جا رہا ہے۔ بغلان کے گورنر مولوی عبداللہ مختار نے چم قلعہ کے علاقے میں ایک نئے صنعتی پارک کا افتتاح کیا تھا جس کا مقصد صنعتی ترقی کو فروغ دینا اور مزید سرمایہ کاری کو راغب کرنا ہے۔ بغلان افغانستان کے بڑے چاول پیدا کرنے والے صوبوں میں سے ایک ہے، اور بغلانی چاول اپنے معیار کی وجہ سے پورے ملک میں مشہور ہے۔
کابل فلور مل منصوبہ
افغانستان کی سینٹرل سائلو اماراتی کمپنی نے کابل میں فلور مل کا منصوبہ مکمل کرلیا ہے۔ امید ریڈیو کے نمائندے کے مطابق، کمپنی کے ایگزیکٹو ڈائریکٹر مولوی نصرت اللہ منصور نے بتایا کہ آٹے کی چکی 100 جریب اراضی پر 21 ملین افغانی کی لاگت سے بنائی گئی ہے اور اس میں روزانہ تقریباً 130 ٹن آٹا تیار کرنے کی صلاحیت ہے۔ کابل سائلو کے عہدیداروں نے بتایا کہ اس سہولت میں اس وقت 50,000 ٹن گندم ذخیرہ کرنے کی گنجائش ہے اور گندم کی پروسیسنگ اور آٹے کی پیداوار کے ذریعے افغانستان کی خود کفالت کو مضبوط بنانے کی کوششیں جاری ہیں۔ انہوں نے یہ بھی بتایا کہ طورخم کراسنگ پر پناہ گزینوں کے لیے روزانہ تقریباً 30,000 روٹیاں تیار اور تقسیم کی جاتی ہیں۔
جبل السراج سیمنٹ پلانٹ کی تعمیر
جبل السراج، صوبہ پروان میں سیمنٹ کے دوسرے بڑے پروڈکشن پلانٹ کی تعمیر کا آغاز کر دیا گیا۔ حکام کے مطابق دوسرے جبل السراج سیمنٹ پلانٹ میں ہر 24 گھنٹے میں 5 ہزار ٹن سیمنٹ پیدا کرنے کی گنجائش ہو گی۔
کابل میں کمرشل مارکیٹ کی تعمیر
اقتصادی کمیشن کی بین الوزارتی سرمایہ کاری کمیٹی نے کابل کے فرسٹ ڈسٹرکٹ میں وزارت خزانہ کی اراضی پر دو تجارتی منڈیوں کی تعمیر کے منصوبوں کا جائزہ لیا اور منظوری دے دی۔ نائب وزیر اعظم برائے اقتصادی امور کے دفتر کے ایک بیان کے مطابق منڈئی کے علاقے میں ظاہر شاہی مارکیٹ آٹھ منزلہ عمارت کے طور پر 161 ملین افغانی کی سرمایہ کاری سے تعمیر کی جائے گی اور تعمیراتی معیارات کے مطابق ہو گی۔ اسی ضلع میں پانچ منزلوں پر مشتمل ایک اور کمرشل مارکیٹ بھی بنائی جائے گی۔ بیان میں کہا گیا ہے کہ تجارتی انفراسٹرکچر کو وسعت دینے کے علاوہ، ان منصوبوں پر عمل درآمد درجنوں افراد کے لیے براہ راست روزگار کے مواقع پیدا کرے گا اور وسطی کابل میں اقتصادی سرگرمیوں میں اضافے میں معاون ثابت ہو گا۔
تالقان صوبہ تخار میں کمرشل مارکیٹ کی تعمیر
نائب وزیراعظم برائے اقتصادی امور ملا عبدالغنی برادر اخوند کی سربراہی میں اقتصادی کمیشن نے صوبہ تخار کے دارالحکومت تالقان میں 110 ملین افغانی کی سرمایہ کاری سے سات منزلہ تجارتی مارکیٹ بنانے کی تجویز کی منظوری دی۔ اقتصادی کمیشن کی جانب سے جاری بیان کے مطابق اجلاس میں نئی ملکی اور غیر ملکی سرمایہ کاری کی حوصلہ افزائی اور راغب کرنے کے لیے ٹیکس اور کسٹم چھوٹ کے نفاذ کے لیے رہنما اصولوں کا بھی جائزہ لیا گیا۔
صحت و طب
افغان وزارت صحت عامہ کے وفد کا دورہ تاشقند
مولوی حمد اللہ زاہد، وزارت صحت عامہ کے فوڈ اینڈ ڈرگ کے نائب وزیر اور ان کے ہمراہ وفد نے اپنے دورہ تاشقند کے دوران ازبکستان کے شعبہ صحت کے حکام سے ملاقات کی۔
افغانستان کی وزارت صحت عامہ کے مطابق، ازبکستان کے نائب وزیر صحت الہام جون عمرزاکوف کے ساتھ بات چیت ہوئی، جس میں صحت، ادویات اور طبی مصنوعات کے شعبوں میں تعاون کو بڑھانے پر تبادلہ خیال کیا گیا۔ دونوں فریقوں نے خصوصی تجربات کے تبادلے، افغان مریضوں کے علاج میں تعاون (خاص طور پر کینسر اور دل کے امراض) اور دونوں ممالک کے درمیان تکنیکی تعلقات کو مضبوط بنانے پر تبادلہ خیال کیا۔ وزارت نے مزید کہا کہ مولوی حمد اللہ زاہد نے دواسازی کی صنعت اور طبی آلات کی ترقی کے لیے ازبکستان کے دفتر کے سربراہ عبداللہ عزیزوف سے بھی الگ سے ملاقات کی، جہاں انہوں نے صلاحیت کو مضبوط بنانے اور تکنیکی عملے کی تربیت، دونوں ممالک کے درمیان دواسازی کی صنعت کی ترقی، کوالٹی کنٹرول لیبارٹریوں کو بہتر بنانے، اور لیبارٹری کے آلات میں تعاون پر تبادلہ خیال کیا۔
روزگان میں UNHCR کی مالی امداد سے مرکز صحت کا افتتاح
افغانستان کی وزارت صحت عامہ نے یو این ایچ سی آر کے مالی تعاون سے صوبہ روزگان کے ضلع دیہ راود میں تین لاکھ پچاسی ہزار ڈالر کی لاگت سے ایک نئے مرکز صحت کا افتتاح کیا ہے۔ وزارت کے ایک بیان کے مطابق افتتاحی تقریب میں وزیر صحت عامہ مولوی نور جلال جلالی اور ان کے ہمراہ وفد نے شرکت کی۔ بیان میں کہا گیا کہ نیو کمیونٹی ہیلتھ سینٹر (نیو سی ایچ سی) 5،096 مربع میٹر کی جگہ پر بنایا گیا تھا۔ یہ سہولت مقامی رہائشیوں کی صحت کی ضروری خدمات تک رسائی کو بہتر بنائے گی اور علاقے میں اہم طبی ضروریات کو پورا کرنے میں مدد کرے گی۔ وزارت نے امید ظاہر کی کہ نیا مرکز صحت کی دیکھ بھال تک رسائی کو بڑھانے اور ضلع میں کمیونٹیز کی مجموعی صحت کو بہتر بنانے میں اہم کردار ادا کرے گا۔
ابو علی سینا بلخی نمائش
افغانستان نے کابل میں ’’ابو علی سینا بلخی‘‘ کے عنوان سے اپنی دوسری قومی اور بین الاقوامی صحت کی دیکھ بھال کی نمائش کا آغاز کیا، جس میں امارت اسلامیہ کے اعلیٰ حکام اور فارماسیوٹیکل سیکٹر کے نمائندوں نے شرکت کی۔ چار روزہ نمائش کا اہتمام افغانستان میڈیسن اینڈ میڈیکل پروڈکٹس یونین نے وزارت صحت عامہ کے تعاون سے کیا تھا۔ اس نمائش میں گیارہ سو سے زائد اقسام کی ملکی سطح پر تیار کردہ ادویات اور طبی مصنوعات رکھی گئیں۔ فارماسیوٹیکل یونین کے عہدیداروں نے بتایا کہ افغانستان اس وقت اپنی مقامی ادویات کی طلب کا 38 فیصد مقامی فیکٹریوں کے ذریعے پیدا کرتا ہے۔ افغانستان میڈیسن اینڈ میڈیکل پراڈکٹس یونین کے سربراہ احمد سعید شمس نے کہا کہ اس وقت ملک بھر میں 135 ملکی فیکٹریاں 1170 قسم کی دوائیں تیار کر رہی ہیں جبکہ 500 دیگر مصنوعات کی جانچ کی جا رہی ہے۔
متفرق
افغانستان کے ناظم الامور کی ملائیشیا کی آٹھویں بین الاقوامی کانفرنس برائے اسلامی فکر و تہذیب میں شرکت
ملیشیا میں افغانستان کے قائم مقام سفیر نقیب اللہ احمدی نے اسلامی فکر اور تہذیب پر آٹھویں بین الاقوامی کانفرنس میں شرکت کی۔ یہ کانفرنس پیراک ریاست کے دارالحکومت ایپوہ میں منعقد ہوئی اور اس میں سلطان آف پیراک، ملائیشیا کے نائب وزیر اعظم، اعلیٰ سرکاری حکام، اسلامی سکالرز اور مختلف ممالک کی علمی شخصیات نے شرکت کی۔ کانفرنس کے موقع پر، احمدی نے پیراک کے سلطان نظرین معیز الدین شاہ، ملائیشیا کے نائب وزیراعظم، اور ملک کے اعلیٰ تعلیم کے وزیر سے بھی الگ الگ ملاقاتیں کیں تاکہ باہمی دلچسپی کے امور پر تبادلہ خیال کیا جا سکے۔
مولوی عبدالسلام حنفی کا بگرام جیل کا دورہ
مولوی عبدالسلام حنفی، نائب وزیراعظم برائے انتظامی امور، کمیشن برائے تنظیمی ڈھانچہ اور تنخواہوں کے ارکان کے ہمراہ بگرام جیل کے مجموعی حالات کا جائزہ لینے اور قیدیوں سے ملاقات کے لیے گئے۔ صدارتی محل (ارگ) سے جاری کردہ ایک بیان کے مطابق، مولوی حنفی اور ان کے ہمراہ وفد نے جیل کے مختلف حصوں کا معائنہ کیا، قیدیوں کے حالات زندگی، صحت کی دیکھ بھال کی خدمات، خوراک کی تقسیم، حراستی سہولیات اور قیدیوں کے مسائل سے نمٹنے کا جائزہ لیا۔ بیان میں مزید کہا گیا کہ مولوی حنفی نے قیدیوں کی درخواستیں سنیں اور جیل حکام کو ہدایت کی کہ وہ اسلامی قانون کے مطابق قیدیوں کے حقوق کی مکمل پاسداری کریں، نظر بندی کے حالات کو بہتر بنائیں، صحت کی دیکھ بھال کی خدمات کو مستحکم کریں اور ان کے مسائل کے حل پر سنجیدگی سے توجہ دیں۔
غور میں 30 ہزار کلو گرام منشیات تلف کر دی گئی
غور کے حکام کا کہنا ہے کہ انہوں نے صوبائی مرکز اور گرد و نواح کے اضلاع سے اکٹھی کی گئی انتیس ہزار کلو گرام سے زائد منشیات کو تلف کر دیا ہے۔ حکام کے مطابق تباہ ہونے والے مادوں میں افیون، چرس، میتھم فیٹامائن، الکوحل اور منشیات کی تیاری میں استعمال ہونے والے مختلف کیمیکلز اور مرکبات شامل ہیں۔
صوبائی حکام نے مزید کہا کہ امارت اسلامیہ کے دوبارہ اقتدار میں آنے کے بعد سے ملک بھر میں منشیات کی کاشت، پیداوار اور اسمگلنگ پر پابندی عائد کر دی گئی ہے اور گزشتہ پانچ سالوں میں ملک بھر میں منشیات کی پیداوار کے درجنوں مراکز اور لیبارٹریوں کو ختم کر دیا گیا ہے۔
سرکاری سرویسز کی ڈیجیٹلائزیشن
نائب وزیراعظم برائے انتظامی امور مولوی عبدالسلام حنفی نے کہا ہے کہ بیوروکریسی کو کم کرنے، عوامی خدمات کی فراہمی کو بڑھانے اور کاغذی دستاویزات کے استعمال کو کم سے کم کرنے کے لیے حکومتی انتظامی عمل کو ڈیجیٹائز کرنا بہت ضروری ہے۔
ٹیلی کمیونیکیشن اور انفارمیشن ٹیکنالوجی نمائش کے افتتاح کے موقع پر حنفی نے کہا کہ اس وقت ملک بھر میں 400 کے قریب ٹیلی کمیونیکیشن سائٹس کام کر رہی ہیں اور افغانستان نے ای گورننس کے شعبے میں بھی قابل ذکر پیش رفت کی ہے۔ انہوں نے اس بات پر زور دیا کہ انتظامی امور کی ڈیجیٹلائزیشن حکومتی طریقہ کار کو ہموار کرنے، تیز تر اور زیادہ قابل رسائی عوامی خدمات فراہم کرنے اور کاغذ پر مبنی دستاویزات پر انحصار کم کرنے میں اہم کردار ادا کرتی ہے۔ انفارمیشن ٹیکنالوجی اور ٹیلی کمیونیکیشن سروسز کو پھیلانے سے شہریوں کی سرکاری خدمات تک رسائی میں اضافہ ہوگا اور انتظامی عمل کو ہموار کیا جائے گا۔
لوگر میں واپس آنے والوں کے لیے 3،385 گھروں کے ٹاؤن کی منظوری
ملک کے شہری ترقی اور ہاؤسنگ کے وزیر مولوی نجیب اللہ حیات حقانی نے صوبہ لوگر میں واپس جانے والے افغان مہاجرین کے لیے رہائشی ٹاؤن کے تفصیلی ماسٹر پلان کی منظوری دے دی اور اس پر دستخط کر دیے۔ وزارت کے مطابق یہ منصوبہ 2،143 جریب اراضی پر تیار کیا جائے گا اور اس میں 3،385 رہائشی پلاٹ شامل ہوں گے۔ رہائش کے علاوہ، منصوبہ سڑکوں، پارکس، اسکولوں، صحت کی دیکھ بھال کی سہولیات، مساجد اور دیگر عوامی خدمات کے لیے جگہ فراہم کرتا ہے تاکہ رہائشیوں کو ضروری بنیادی ڈھانچے اور سہولیات تک رسائی حاصل ہو۔ شہری ترقی اور مکانات کی وزارت نے کہا کہ وہ واپس آنے والے پناہ گزینوں کو محفوظ، باوقار اور پائیدار زندگی کے حالات فراہم کرنے کے لیے اسی طرح کی رہائشی بستیوں کی منصوبہ بندی اور ان پر عمل درآمد کو تیز اور منظم کرتا رہے گا۔
٭٭٭٭٭