یروشلم، یروشلم

لہو اگل رہا ہے آج، میرا پُر فنوں قلم
خیال پرزے پرزے ہیں، کروں میں کس طرح بہم

یروشلم، یروشلم، تو اک حریمِ محترم
تجھے دیا ہے ہاتھ سے، بہ زخمِ دل بہ چشمِ نم

جہاں کی ساری راحتیں، سپردِ سیلِ نار کیں
ترے وقار کے لیے، لہو دیا قدم قدم

یہیں سے ہو کے عرش کو، سواریٔ نبی گئی
یہاں کی خاک پر ٹکے، براقِ نور کے قدم

نمازِ بے مثل یاں، وہ کی گئی ہے اک ادا
کھڑے تھے اک قطار میں ملا کے انبیاء قدم

تسلطِ یہود یاں، رہے؟ نہیں، کبھی نہیں
میں دیکھتا ہوں آج پھر ’’صلاحِ دین‘‘ کا عَلَم

بہ راہِ داستانِ دل، مہیب حادثوں کے موڑ
مثالِ زلفِ یار ہیں، سیاستوں کے پیچ و خم

ہمارے اردگرد ہیں، شکاریانِ حلقہ زن
اُدھر سے ناوکِ ستم، اِدھر سے ناوکِ ستم،

مؤحدینِ کعبہ کی صفیں پھٹی پھٹی ہوئی
کلیسیا، کنشت، دیر، صومعہ، سبھی بہم

عرب کے پیارے بھائیو! نگہ کی باگ موڑ دو
فریب ’’دینِ زرگراں‘‘، طلسم ’’مذہبِ شکم‘‘

قسائیوں کے فیض سے، ہے ایشیائے مغربی
تمام ریگ زار میں رواں ہے ایک سیلِ دم

مرے دیار پاک میں، قلوب سے اٹھا دھواں
دریدہ تن ہؤا عرب، تپیدہ جان ہؤا عجم

اگر خدا نصیر ہو، اگر خودی میں خم نہیں
ہیں خارِ رہ رفیقِ رہ ! ہمارے سنگِ میل غم

ابھی کثیر آفتیں، ابھی ہزار حادثے
دیارِ کاشمیر سے بہ مسجدِ یروشلم

متاع شوق اور کیا، بس ایک نامِ مصطفیٰؑ
ہمارے پاس اور کیا! نہ تاجِ کَے، نہ جامِ جم

پھر ایک بار آئیں گے، یہ جاں نثار آئیں گے
بہ صد وقار آئیں گے، ترے وقار کی قسم!

شکستِ آرزو کا کیا، فسانہ ہو سکے رقم
_______________یروشلم، یروشلم!

ترے ہی سنگِ در پہ آج، منہ کے بل گرے ہیں ہم
_______________یروشلم، یروشلم!

کئی ہزار میتیں، گلی گلی نثار کیں
_______________یروشلم، یروشلم!

ابھی تک ان فضاؤں میں، ہے اک مہک بسی ہوئی
_______________یروشلم، یروشلم!

بہ اقتدائے مصطفؐیٰ، حبیبِ خاص کبریا،
_______________یروشلم، یروشلم!

یہ ظلم ایسا ظلم ہے کہ جس کی تاب ہی نہیں
_______________یروشلم، یروشلم!

صدارتوں کی سازشیں، سفارتوں کے جوڑ توڑ
_______________یروشلم، یروشلم!

اُدھر بھی دامِ مکروفن، اِدھر بھی دام مکرو فن
_________________یروشلم، یروشلم!

محبتوں کی ڈوریاں سبھی کٹی کٹی ہوئی
_______________یروشلم، یروشلم!

بتانِ شرق و غرب کے، تمام سحر توڑ دو
_______________یروشلم، یروشلم!

طویل اور عریض اک، دکانِ لحمِ آدمی
_______________یروشلم، یروشلم!

جکارتا سے انقرہ، فضائیں ہیں فغاں فغاں،
_______________یروشلم، یروشلم!

ہماری راہِ شوق میں ہزار غم ہوں، غم نہیں
_________________یروشلم، یروشلم!

ابھی طویل فاصلے، ابھی ہزار معرکے
_______________یروشلم، یروشلم!

شعورِ حق، جنونِ دیں، دلِ غمیں، لبِ دعا
_______________یروشلم، یروشلم!

اجل کے دوش پر سوار، شہسوار آئیں گے
_______________یروشلم، یروشلم!